4. ಈಶಾನ್ಯದ ಮುಖ್ಯದ್ವಾರದ ವೈಜ್ಞಾನಿಕ ಸ್ಪಷ್ಟ ಚಿತ್ರೀಕರಣ

ವಾಸ್ತುವಿನ ಮೊದಲ ಅಧ್ಯಾಯವೇ ಮನೆಯ ಮುಖ್ಯ ದ್ವಾರ. ಈ ಮೊದಲನೆಯ ಅಧ್ಯಾಯದಲ್ಲಿ ನಾವು ಎಷ್ಟೊಂದು ತಪ್ಪು ತಿಳುವಳಿಕೆಗೆ ಬಲಿಯಾಗಿದ್ದೇವೆ ಎಂಬುದು ಇಲ್ಲಿಯವರೆಗೆ ಯಾರಿಗೂ ಗೊತ್ತಿರಲಾರದ ವಿಷಯವನ್ನು ನಾನು ನಕ್ಷೆಯ ಮೂಲಕ ಕೆಳಗೆ ಪ್ರಸ್ತಾಪವನ್ನು ಮಾಡುತ್ತಿದ್ದೇನೆ. ಈ ಮೇಲಿನ ಚಿತ್ರದಲ್ಲಿ ಮೂರು ನಕ್ಷೆಗಳನ್ನು ಗಮನಿಸಿ ನೋಡಿರಿ. ನಿಮಗೆ ಮೊದಲನೆಯ ನಕ್ಷೆಯ ಮುಖ್ಯ ದ್ವಾರ ಯಾವುದೆಂದು ತಿಳಿದು ಬರುತ್ತದೆ?

ನನ್ನ ಪ್ರತಿಯೊಂದು ಉಪನ್ಯಾಸ ಕಾರ್ಯಕ್ರಮದಲ್ಲಿ ಪ್ರತಿಯೊಬ್ಬರಿಗೂ ಪ್ರಶ್ನಿಸಿದಾಗ ಬಂದ ಉತ್ತರ, ಉತ್ತರ ಬಾಗಿಲು ಎಂದು. ಇದಕ್ಕೆ ನನ್ನ ಸಹಮತವಿದೆ. ಇನ್ನು 2 ನೇಯ ನಕ್ಷೆಯ ಮುಖ್ಯ ದ್ವಾರ ಯಾವ ದಿಕ್ಕಿಗೆ ಇದೆ ಎಂದು ಪ್ರಶ್ನಿಸಿದರೆ ಪ್ರತಿಯೊಬ್ಬರಿಂದ ಬಂದ ಉತ್ತರ ಮತ್ತು ದೇಶದ ಪ್ರತಿಯೊಂದು ವಾಸ್ತು ಪುಸ್ತಕದಲ್ಲಿ ಬರೆದ ಉತ್ತರ, ಇದು ಈಶಾನ್ಯದ ಬಾಗಿಲು ಎಂದು. ಈ ಉತ್ತರಕ್ಕೆ ಓರ್ವ ಇಂಜಿನೀಯರ ಆಗಿ ನನ್ನ ಸಹಮತವಿಲ್ಲ. ಏಕೆ ಸಹಮತವಿಲ್ಲವೆಂದು ಮುಂದೆ ವಿವರಿಸುತ್ತೇನೆ.

ಇನ್ನು 3ನೇ ನಕ್ಷೆಯ ಮುಖ್ಯ ದ್ವಾರ ಯಾವ ದಿಕ್ಕಿಗೆ ಇದೆ ಎಂದು ಪ್ರಶ್ನಿಸಿದಾಗ ಪ್ರತಿಯೊರ್ವರಿಂದ ಅಲ್ಲದೆ ವಾಸ್ತು ಪಂಡಿತರು ಬರೆದ ಪುಸ್ತಕದಲ್ಲಿರುವ ಉತ್ತರ, ವಾಯುವ್ಯ ದಿಕ್ಕಿನ ಬಾಗಿಲು ಎಂದು. ಈ ಉತ್ತರಕ್ಕೂ ಸಹ ನನ್ನ ಸಹಮತವಿಲ್ಲ. ಏಕೆ ಸಹಮತವಿಲ್ಲ ಎಂದು ಉತ್ತರಿಸುವ ಮೊದಲು ಪರಮ ಪೂಜ್ಯ ಶ್ರೀ ಶ್ರೀ ಶ್ರೀ ಸಿದ್ದೇಶ್ವರ ಸ್ವಾಜೀಜಿಗಳು ಜ್ಞಾನಯೋಗಾಶ್ರಮ ವಿಜಾಪೂರ, ಇವರ ಬಗ್ಗೆ ಒಂದೆರಡು ಮಾತುಗಳನ್ನು ಹೇಳಲು ಇಚ್ಛಿಸುತ್ತೇನೆ.

ಇವರ ಬಗ್ಗೆ ಗೊತ್ತಿರಲಾರದ ವ್ಯಕ್ತಿಗಳು ಯಾರೂ ಇಲ್ಲ ಎಂದರೆ ಅತೀಶಯೋಕ್ತಿ ಏನೂ ಅಲ್ಲ. ಇವರು ಕರ್ನಾಟಕದಲ್ಲಿ ಅಲ್ಲದೇ ದೇಶದ ಅನೇಕ ಭಾಗಗಳಲ್ಲಿ ನಿರಂತರವಾಗಿ ಪ್ರವಚನ ನೀಡಿರುತ್ತಾರೆ. ಅಪಾರ ಪಾಂಡಿತ್ಯ ಹೊಂದಿರುವ ಸ್ವಾಮೀಜಿಯವರ ಬಗ್ಗೆ ಎಷ್ಟೇ ಗುಣಗಾನ ಮಾಡಿದರೂ ಕಡಿಮೆಯೇ. ಅವರನ್ನು ಜನತೆಯು ಕಲಿಯುಗದ ಬಸವಣ್ಣ” ಎಂದೇ ಕರೆಯುತ್ತಾರೆ. ಅವರ ಆಶಾರಹಿತ ಸರಳ ಜೀವನ ಹಾಗೂ ಮೃದು ಸ್ವಭಾವ, ಸಮಯ ಶೀಲತೆ, ಪ್ರತಿಯೋರ್ವರಿಗೂ ದಾರಿದೀಪ. ಅವರ ಒಂದು ಪ್ರವಚನ ಕ್ಯಾಸೆಟ್ನಲ್ಲಿ ವಾಸ್ತುವಿನ ಬಗ್ಗೆ ಒಂದು ಮಾತನ್ನು ಹೇಳಿದ್ದಾರೆ. ನಡುವಿರುವ ಬಾಗಿಲನ್ನು ತೆಗೆದು ಈಶಾನ್ಯ ಮೂಲೆಯಲ್ಲಿ ಬಾಗಿಲನ್ನು ಹಾಕಿದರೆ ನೀವು ಯಾವ ಬದಲಾವಣೆಯನ್ನು ಕಾಣುವಿರಿ? (ನಾವು ಮೇಲೆ ತಿಳಿಸಿರುವ ನಕ್ಷೆಯಂತೆ) ಎಂದು ಪ್ರಶ್ನಿಸಿದ್ದಾರೆ. ಇಂತಹ ಮಹಾನ್ ವ್ಯಕ್ತಿ ಈ ಮಾತನ್ನು ಹೇಳಿರಬೇಕಾದರೆ ಎಷ್ಟೊಂದು ವೈಚಾರಿಕತೆಯಿಂದ ಹೇಳಿರಬಹುದು. ಅವರು ಹೇಳಿದ ಮಾತಲ್ಲಿ ಸತ್ಯವಿದೆ. ಇದರ ಬಗ್ಗೆ ನಾವು ಯಾರೂ ವಿಚಾರ ಮಾಡಲು ಹೋಗಿಲ್ಲ. ಒಂದು ವೇಳೆ ವಿಚಾರ ಮಾಡಿದ್ದರೆ. ಲಕ್ಷಗಟ್ಟಲೆ ಹಣ ಖರ್ಚು ಮಾಡುವುದನ್ನು ಉಳಿಸಬಹುದಿತ್ತು. ಸ್ವಾಮಿಜೀಯವರ ವಿಚಾರಧಾರೆಗೆ ನನ್ನ ಸಹಮತವಿದೆ. ಅದು ಹೇಗೆ ಎಂಬುವುದನ್ನು ಓರ್ವ ಇಂಜಿನೀಯರ್ ಆಗಿ ಚಿತ್ರದ ಮೂಲಕ ವಿವರಿಸುತ್ತೇನೆ.

ಇದಕ್ಕೂ ಮೊದಲು ದಿಕ್ಕುಗಳನ್ನು ನೀವು ಹೇಗೆ ಕಂಡು ಹಿಡಿಯುವಿರಿ? ಇದು ಎಲ್ಲರಿಗೂ ಗೊತ್ತಿರುವಂತೆ ದಿಕ್ಸೂಚಿಯಿಂದಲೇ ಸಾಧ್ಯ. ನಾವು ಆಗ ಮೇಲ್ಕಾಣಿಸಿದ ಚಿತ್ರ ಒಂದರ ನಕ್ಷೆಗೆ ಬರೋಣ. ಮನೆಯೊಳಗೆ ನಿಂತು ದ್ವಾರದಲ್ಲಿ ದಿಕ್ಸೂಚಿಯ ಮೂಲಕ ನೋಡಿದಾಗ ಆ ದಿಕ್ಸೂಚಿಯು ಉತ್ತರ ದಿಕ್ಕನ್ನು ತೊರಿಸುತ್ತದೆ.

ಇನ್ನು ಚಿತ್ರ 2ರ ನಕ್ಷೆಯ ಪ್ರಕಾರದ ಹಾಗೆ ಬಾಗಿಲೊಳಗೆ ನಿಂತು ಮತ್ತೆ ದಿಕ್ಸೂಚಿಯನ್ನು ನೋಡಿದಾಗ ಅದು ಏನನ್ನು ತೋರಿಸುವುದು? ವಾಸ್ತು ಪುಸ್ತಕ ಬರೆದ ಪಂಡಿತರ ಹೇಳಿಕೆ ಪ್ರಕಾರ ಹಾಗೂ ಇವತ್ತು ಎಲ್ಲರೂ ತಿಳಿದುಕೊಂಡಂತೆ ಇದು ಈಶಾನ್ಯ ದಿಕ್ಕನ್ನೇ ತೋರಿಸಬೇಕಾಗಿತ್ತು. ಆದರೆ ದಿಕ್ಸೂಚಿಯು ಮತ್ತೆ ಉತ್ತರ ದಿಕ್ಕನ್ನೇ ತೋರಿಸುತ್ತದೆ. ಇದನ್ನು ಯಾರು ಪರೀಕ್ಷೆ ಮಾಡಿದರೂ ಅವರಿಗೆ ಆ ವಿಷಯ ತಿಳಿಯುತ್ತದೆ. ಇದರ ಅರ್ಥ ಇಲ್ಲಿಯವರೆಗೆ ಬರೆದಂತಹ ಪುಸ್ತಕದ ಪ್ರಕಾರ ಇದು ಈಶಾನ್ಯ ದ್ವಾರ ಎಂದು ಬರೆದಿರುವುದು ಅಪ್ಪಟ ಸುಳ್ಳು ಎಂದು ರುಜುವಾತಾಗುತ್ತದೆ. ಇನ್ನು ಅವರ ಪ್ರಕಾರ ಹೋದರೆ ಅದು ಈಶಾನ್ಯದ ಬಾಗಿಲು ಅಲ್ಲ (ಚಿತ್ರ 2 ರಂತೆ) ಅದು ಈಶಾನ್ಯದ ಸ್ಥಳದಲ್ಲಿ ಇರುವಂತಹ ಉತ್ತರ ದಿಕ್ಕಿನ ಬಾಗಿಲು. ಅಂದರೆ ತಿಳಿದುಕೊಂಡು ಬರೆದು ಜನರನ್ನು ತಪ್ಪು ದಾರಿಗೆ ಎಳೆದಿದ್ದಾರೆ.

ಇದೇ ಮಾತು ಚಿತ್ರ 3ಕ್ಕೂ ಅನ್ವಯಿಸುತ್ತದೆ. ಎಷ್ಟೋ ವಾಸ್ತು ಪುಸ್ತಕ ಬರೆದ ಪಂಡಿತರಿಗೆ ದಿಕ್ಸೂಚಿಯೆಂದರೆ ಏನೆಂದು ಗೊತ್ತಿಲ್ಲ. ಅದರಲ್ಲಿ ಬಹಳಷ್ಟು ವಾಸ್ತು ಪಂಡಿತರು ತಾಂತ್ರಿಕ ಅರ್ಹತೆ ಇರಲಾರದ ವ್ಯಕ್ತಿಗಳು ಈ ರೀತಿಯ ಪುಸ್ತಕಗಳನ್ನು ಬರೆದಿದ್ದಾರೆ. ಅಲ್ಲದೇ ಇನ್ನೂ ಅನೇಕ ಇಂಜನೀಯರ್‍ಗಳೂ ಸಹಿತ ಇದೇ ರೀತಿ ಬರೆದಿರುವುದು ನನಗೆ ಕೆಡುಕೆನಿಸುತ್ತದೆ. ಯಾಕೆಂದರೆ ಈ ದಿಕ್ಸೂಚಿಯ ಬಗ್ಗೆ 4 ವರ್ಷಗಳ ಕಾಲ ಅಧ್ಯಯನ ಮಾಡಿರುತ್ತೇವೆ.

ಮುಖ್ಯ ದ್ವಾರ ವಾಸ್ತುವಿನ ಮೊದಲನೆಯ ಅಧ್ಯಾಯನ್ನುವುದು ನಾವು ಈಗಾಗಲೇ ಹೇಳಿದ್ದೇವೆ. ಅಂದರೆ ಮೊದಲನೆಯ ಅಧ್ಯಾಯದಲ್ಲಿ ನಾವು ಎಷ್ಟೊಂದು ತಪ್ಪನ್ನು ಮಾಡುತ್ತಿದ್ದೇವೆಂದು ಸ್ಪಷ್ಟವಾಗುತ್ತದೆ. ಮನುಷ್ಯನಿಗೆ ಬಾಯಿಯೊಂದು ಮುಖ್ಯವಾದ ಅಂಗ. ಅದರಂತೆಯೇ ಮನೆಯ ಮುಖ್ಯದ್ವಾರವೂ ಮನೆಗೆ ಅತೀ ಮುಖ್ಯ ಬಾಯಿಗೇನಾದರು ಆದರೆ ನಮಗೆ ಆಹಾರ ತೆಗೆದುಕೊಳ್ಳಲು ಆಗುವುದಿಲ್ಲ, ನೀರು ಕುಡಿಯಲು ಆಗದೇ ದೇಹವೆಲ್ಲ ಹಾನಿಗೊಳಗಾಗುತ್ತದೆ. ಅದರಂತೆಯೇ ಮನೆಯ ಮುಖ್ಯದ್ವಾರವೂ ಸಹ ಸರಿ ಇಲ್ಲದಿದ್ದಾಗ ನಾವು ತುಂಬಾ ತೊಂದರೆ ಅನುಭವಿಸುತ್ತೇವೆ.

ಈ ವಿಷಯದ ಬಗ್ಗೆ ನಾನು Institute of Engineer ಮೈಸೂರಿನಲ್ಲಿ ಮತ್ತು ಡ್ಯಾಂ ಸೈಟ ಆಲಮಟ್ಟಿಯಲ್ಲಿ ಉಪನ್ಯಾಸ ನೀಡುವಾಗ ಎಲ್ಲ ಇಂಜಿನೀಯರಗಳ ಎದುರು ಈ ವಿಷಯದ ಬಗ್ಗೆ ಪ್ರತಿಪಾದಿಸಿದ್ದೇನೆ. ಅವರೆಲ್ಲರಿಂದ ಬಂದ ಆಶ್ಚರ್ಯದ ಉದ್ಗಾರವೆಂದರೆ ಈ ರೀತಿ ಅವರೆಂದೂ ಯೋಚಿಸಿಯೇ ಇಲ್ಲ. ಇದು ನಿಜವಾಗಿಯೂ ನಾವು ಕೂಡ ಒಪ್ಪಲೇಬೇಕಾದ ವಿಚಾರವೆಂದು ಸಹಮತ ವ್ಯಕ್ತಪಡಿಸಿದರು.

ಒಂದು ವೇಳೆ ನಿಮಗೆ ಈಶಾನ್ಯದ ಬಾಗಿಲು ಇರಬೇಕಾದರೆ ಕೆಳಗೆ ಕಾಣಿಸಿದ ಚಿತ್ರದಂತೆ ಇಡಬೇಕಾಗುವುದು.

ಚಿತ್ರ ಮತ್ತು ವಿವರಗಳನ್ನು ಓದಿದ ಮೇಲೆ ಈ ವಿಷಯದಲ್ಲಿ ನಿಮಗೆ ಸ್ಪಷ್ಟವಾಗಿದೆ ಎಂದು ಭಾವಿಸಿ ಮುಂದಿನ ವಿಷಯದ ಬಗ್ಗೆ ವಿವರಣೆ ನೀಡಬಯಸುತ್ತೇನೆ. ಒಂದು ವೇಳೆ ತಮಗೆ ಸ್ಪಷ್ಟವಾಗಿ ಅರ್ಥವಾಗಿಲ್ಲದಿದ್ದರೆ, ನಮ್ಮ ಸಂಸ್ಥೆಗೆ ಕರೆ ಮಾಡಿ ತಿಳಿದುಕೊಳ್ಳಿ.