17. ಒಂದೇ ಸರಳರೇಖೆಯಲ್ಲಿ ಮೂರು ಬಾಗಿಲುಗಳಿದ್ದರೆ ಅದರಿಂದಾಗುವ ಪರಿಣಾಮ

ಈ ಬಗ್ಗೆಯೂ ಸಾಕಷ್ಟು ವಾಸ್ತು ಪುಸ್ತಕಗಳಲ್ಲಿ ವಾಸ್ತು ಪಂಡಿತರು ಬರೆದಿರುವರು. ಆದರೆ ಅವರಿಗೆ ನೀವೇನಾದರೂ ಯಾಕಿರಬಾರದು ಎಂದು ಪ್ರಶ್ನಿಸಿದರೆ ಅವರ ಬಳಿ ಉತ್ತರವಿಲ್ಲ. ಹೋಗಲಿ ಒಂದು ವೇಳೆ ನಾಲ್ಕು ಅಥವಾ ಐದು ಬಾಗಿಲುಗಳು ಒಂದೇ ಸರಳರೇಖೆಯಲ್ಲಿದ್ದರೆ ಎಂದು ಕೇಳಿದರೆ ಇದಕ್ಕೂ ಸಹಿತ ನಿಮಗೆ ಉತ್ತರ ಸಿಗುವುದಿಲ್ಲ.

ಒಂದು ಬಾರಿ ಗೋಕಾಕ್‍ನಲ್ಲಿ ಉಪನ್ಯಾಸ ಕಾರ್ಯಕ್ರಮ ನೀಡುವಾಗ ಸಭಿಕರಲ್ಲಿ ಈ ಪ್ರಶ್ನೆಯನ್ನು ಕೇಳಿದೆ. ಆಗ ಅವರಿಂದ ಬಂದ ಉತ್ತರ ಮೂರು ಬಾಗಿಲುಗಳು ಒಂದೇ ನೇರವಾಗಿ ಬಂದಿದ್ದರೆ ಬಾಳು ಮೂರಾಬಟ್ಟಿಯಾಗುತ್ತದೆ. (ಜೀವನ ಹಾಳಾಗುವುದು) ಎಂದರು. ತಕ್ಷಣ ನಾನು ಅವರಿಗೆ ಹಾಗಾದರೆ ನಾಲ್ಕು ಬಾಗಿಲುಗಳಿದ್ದರೆ ಏನಾಗುವುದು? ನಾಲ್ಕುಬಟ್ಟೆಯೇ? ಎಂದು ಪ್ರಶ್ನಿಸಿದೆ ಇನ್ನು ಈ ತೊಂದರೆಯಿಂದ ಹೊರಬರಲು ಸಾಕಷ್ಟು ಜನ ಬಾಗಿಲನ್ನೇ ಗೋಡೆ ಮುರಿದು ಇನ್ನೊಂದೆಡೆ ಹಚ್ಚುವ ಮೂಲಕ ಸಾಕಷ್ಟು ಹಣವನ್ನು ಕಳೆದುಕೊಂಡಿದ್ದಾರೆ. ಹಾಗೂ ನಾವು ಎಷ್ಟೊ ಮನೆಗಳಲ್ಲಿ ಈ ರೀತಿ ಮಾಡಿರುವುದನ್ನು ನೋಡಿರುತ್ತೇವೆ.

ಈ ಮೇಲಿನ ನಕ್ಷೆಯನ್ನು ನೀವು ನೋಡಿದರೆ ನಿಮಗೆ ಅರಿವಾಗುವುದು. ಈ ರೀತಿಯ ಮೂರು ಬಾಗಿಲುಗಳಿದ್ದರೆ ಸರಳ ವಾಸ್ತುವಿನಲ್ಲಿ ಯಾವ ರೀತಿಯ ಪರಿಹಾರ ಸೂಚಿಸಲಾಗುತ್ತದೆ ಎಂದು ನೀವು ಪ್ರಶ್ನಿಸಬಹುದು. ಆಗ ವಿಧಾನ ಯಾವುದೆಂದು ನಿಮಗೆ ತಿಳಿದಾಗ ನಿಮಗೂ ಇದು ಇಷ್ಟೊಂದು ಸರಳವೇ? ಎಂದು ಆಶ್ಚರ್ಯವಾಗುವುದು. ಆ ವಿಧಾನ ಯಾವುದೆಂದರೆ ನಡುವಿನ ಬಾಗಿಲಿಗೆ ಒಂದು ಪರದೆಯನ್ನು ಹಾಕಿದರೆ ಸಾಕು. ಯಾವುದೇ ಬಾಗಿಲನ್ನು ಮುಚ್ಚಿ ಇನ್ನೊಂದೆಡೆ ಬಾಗಿಲನ್ನು ಹಚ್ಚುವ ಅವಶ್ಯಕತೆ ಇಲ್ಲ. ಇದನ್ನು ಅಳವಡಿಸಲು ಎಷ್ಟೊಂದು ಸುಲಭ ಹಾಗೂ ಮಿತವ್ಯಯ ಇದರ ಪರಿಣಾಮ ನಿಮಗೆ ಕೆಲವೇ ಗಂಟೆಗಳಲ್ಲಿ ತಿಳಿಯುತ್ತದೆ.

ಇನ್ನು ನಿಮ್ಮ ಮೊದಲಿನ ಪ್ರಶ್ನೆ ಹಾಗೆಯೇ ಉಳಿಯಿತು. ಅದೇನೆಂದರೆ ನೇರವಾಗಿ ಮೂರು ಬಾಗಿಲು ಏಕಿರಬಾರದು ಎಂಬುದು. ನಾನು ಇದರ ವ್ಯಜ್ಞಾನಿಕ ವಿಶ್ಲೇಷಣೆಯನ್ನು ತಮ್ಮ ಮುಂದಿಡುತ್ತೇನೆ. ಒಂದು ದ್ವಾರದಿಂದ ಪ್ರವೇಶಿಸುವ ಶಕ್ತಿಯು (Energy) ಹಾಗೆಯೇ ನೇರವಾಗಿ ಮತ್ತೊಂದು ಬಾಗಿಲಿನ ಮೂಲಕ ಹೊರಹೋಗುತ್ತದೆ. ಆ ರೀತಿ ಹೊರಹೋಗುವ ಶಕ್ತಿಯ ಮೂಲಕ ಆ ಸ್ಥಳದಲ್ಲಿ ಶಕ್ತಿಯ ಅಭಾವ ಉಂಟಾಗಿ ಆ ಮನೆಯಲ್ಲಿ ಆರೋಗ್ಯದ ತೊಂದರೆ ಅಲ್ಲದೆ ಮನಸ್ಸಿನಲ್ಲಿ ಕಿರಿಕಿರಿ ಉಂಟಾಗುವುದು. ಪರದೆಯನ್ನು ಹಾಕುವುದರ ಮೂಲಕ ನಿಮಗೆ ಈ ಎಲ್ಲ ತೊಂದರೆಗಳಿಂದ ಸುಲಭವಾಗಿ ಮುಕ್ತಿ ಸಿಗುವುದು. ಇನ್ನೊಂದು ವಿಷಯ ಗೊತ್ತಿರಲಿ ನೇರವಾಗಿ ಮೂರು ಅಥವಾ ಐದು ಬಾಗಿಲುಗಳು ಇದ್ದರೂ ಇದೇ ರೀತಿಯಲ್ಲಿ ಸುಲಭ ಪರಿಹಾರ ಪಡೆಯಬಹುದು.