21. ವಾಸ್ತುವಿನ ಬಗ್ಗೆ ಕೆಲವೊಂದು ಸಲಹೆಗಳು

ಪ್ರಚಲಿತ ವಾಸ್ತುವಿನ ಪ್ರಕಾರ ಮನೆಯಲ್ಲಿಯ ಮೆಟ್ಟಿಲುಗಳು (ಸ್ಟೇರ್ ಕೇಸ್) ಮನೆಯ ಮಧ್ಯಭಾಗದಲ್ಲಿ ಇರಬಾರದು, ಮತ್ತು ಅದರ ಮೆಟ್ಟಿಲುಗಳು ಪೂರ್ವದಿಂದ ಪಶ್ಚಿಮದ ಕಡೆಗೆ ಮತ್ತು ಉತ್ತರದಿಂದ ದಕ್ಷಿಣದ ಕಡೆಗೆ ಇರಬೇಕು, ಈಶಾನ್ಯದಲ್ಲಿ ಇರಬಾರದು, ಇದ್ದರೆ ಅದನ್ನು ಒಡೆಯಬೇಕು. ಇದಲ್ಲದೇ ಮನೆಯ ಮುಖ್ಯ ದ್ವಾರದ ಎದುರಿಗೆ ಸ್ಟೇರ್ ಕೇಸ್ ಇರಬಾರದು, ಇದ್ದರೆ ಕೆಡುವಬೇಕೆಂದು ಪ್ರಚಲಿತ ವಾಸ್ತು ಪುಸ್ತಕಗಳಲ್ಲಿ ಬರೆದಿದೆ, ಮತ್ತು ಅನೇಕ ವಾಸ್ತು ಸಲಹೆಗಾರರು ಇದೇ ರೀತಿ ಸಲಹೆ ನೀಡುತ್ತಾರೆ.

ಸ್ಟೇರ್ ಕೇಸ್‍ಗೆ ಸಂಬಂಧಿಸಿದ ಎಲ್ಲ ಸಮಸ್ಯೆಗಳಿಗೂ ತಾವು ಸ್ಟೇರ್ ಕೇಸ್‍ನ್ನು ಒಡೆಯುವ ಅವಶ್ಯಕತೆ ಇಲ್ಲ. ಈ ಸಮಸ್ಯಗೆ ಅದನ್ನು ಒಡೆಯಲಾರದೇ ಪರಿಹಾರವನ್ನು ಸರಳ ವಾಸ್ತುವಿನ ಮುಖಾಂತರ ತಾವು ಪಡೆಯಲು ಸಾಧ್ಯವಿದೆ. ಪ್ರಚಲಿತ ಕೆಲವು ವಾಸ್ತು ಪಂಡಿತರು ಮನೆಯ ಆವರಣದಲ್ಲಿದ್ದ ಗಿಡಮರಗಳನ್ನು ಕೆಲವೊಂದು ದಿಕ್ಕುಗಳಲ್ಲಿದ್ದರೆ, ಮನೆಯ ಮುಖ್ಯ ಬಾಗಿಲಿನ ಎದುರಿಗಿದ್ದರೆ, ಅವು ತಮಗೆ ಒಳ್ಳೆಯದಲ್ಲ. ಅದನ್ನು ಕಡಿದು ಹಾಕಬೇಕೆಂದು ಸಲಹೆ ನೀಡುತ್ತಾರೆ. ದಯವಿಟ್ಟು ಯಾರೂ ಈ ಕ್ರೂರ ಅಮಾನುಷ ಕಾರ್ಯವೆಸಗಿ ಪಾಪ ಕಟ್ಟಿಕೊಳ್ಳಬೇಡಿ.

ಅದೇ ಗಿಡಗಳು ನಮಗೆ ಹೂ, ಹಣ್ಣು, ಕಟ್ಟಿಗೆ ಕೊಡುತ್ತವೆ. ವಾತಾವರಣಗಳನ್ನು ಶುದ್ಧಿಗೊಳಿಸುತ್ತವೆ. ಇದಲ್ಲದೇ ಹೆಚ್ಚಿಗೆ ಮಳೆ ಬರಲು ಅನುಕೂಲ ಮಾಡಿಕೊಡುತ್ತವೆ. ಭೂಮಿಯ ಸುಂದರತೆಯನ್ನು ಹೆಚ್ಚಿಸುತ್ತವೆ. ನಮಗೆ ನೆರಳನ್ನು ಕೊಟ್ಟು ಮನೆಯನ್ನು ತಂಪಾಗಿರಿಸಲು ಸಹಾಯಕವಾಗುತ್ತವೆ. ಇಷ್ಟೆಲ್ಲ ಉಪಯುಕ್ತವಿರುವ ಗಿಡಗಳು ನಮ್ಮ ಒಳ್ಳೆಯ ಮಿತ್ರರಾಗಿರುವಾಗ ಅವನ್ನು ಕಲ್ಪವೃಕ್ಷ ಎಂದು ಕರೆದರೆ ತಪ್ಪೇನಿಲ್ಲ.

ಮೇಲಿನ ಚಿತ್ರದಲ್ಲಿ ತೋರಿಸಿದಂತೆ ಪ್ರಚಲಿತ ವಾಸ್ತುವಿನ ಪ್ರಕಾರ ಮನೆಯ ಮುಖ್ಯ ಬಾಗಿಲಿನ ಎದುರಿಗೆ ಗಿಡ ಇರಬಾರದೆಂಬುದನ್ನು ಎಲ್ಲರು ನಂಬುತ್ತಾರೆ. ಆದರೆ ಅದನ್ನು ಕಡಿಯುವುದು ಮೂರ್ಖತನದ ಪರಮಾವಧಿ.ಅದರಿಂದ ಆಗುವ ದುಷ್ಪರಿಣಾಮವನ್ನು ತಳ್ಳಿ ಹಾಕಲು ಬೇರೆ ಸರಳ ಉಪಾಯ ಇದೆ. ಮರಗಳನ್ನು ಕಡಿಯದೇ ಅದರ ಸಮಸ್ಯೆಗೆ ಪರಿಹಾರ “ಸರಳ ವಾಸ್ತುವಿನಲ್ಲಿದೆ“

ಮನೆಯಲ್ಲಿ ಬರುವ ಹಾಲ್ ಭಾಗವು ಮನೆಯ ಪ್ರಮುಖ ಸ್ಥಳವಾಗಿದ್ದು ಮನೆಯಲ್ಲಿರುವ ವಸ್ತುಗಳ ಮೇಲೆ ಪ್ರಭಾವ ಬೀರುತ್ತದೆ. ಈ ಭಾಗದಲ್ಲಿ ನಾವು ಇರಿಸುವ ಸೋಪಾ, ಕುರ್ಚಿ, ಟಿ.ವಿ ಮುಂತಾದವುಗಳು ಸಹಿತ ತಮ್ಮದೇ ಆದ ಪ್ರಾಮುಖ್ಯತೆಯನ್ನು ಹೊಂದಿವೆ. ಕೆಲವೊಮ್ಮೆ ಇವು ಮನೆಯನ್ನು ಪ್ರವೇಶಿಸುವ ಶಕ್ತಿಗೂ ಸಹ ತೊಂದರೆ ಉಂಟು ಮಾಡುತ್ತವೆ. ಹಾಲ್‍ನಲ್ಲಿ ಮೇಲ್ಕಂಡ ವಸ್ತುಗಳನ್ನೆಲ್ಲಾ ಇಡುವ ಮೊದಲು ಸರಳ ವಾಸ್ತು ತಜ್ಞರನ್ನು ಸಂಪರ್ಕಿಸಿ ಸಲಹೆ ಪಡೆಯುವುದು ಒಳಿತು.

ಮನೆಯ ನಿರ್ಮಾಣದಲ್ಲಿ ದೇವರ ಪೂಜಾ ಸ್ಥಾನಕ್ಕೆ ತನ್ನದೇ ಆದ ಪ್ರಾಮುಖ್ಯತೆ ಇದೆ. ಪೂಜೆ ಸ್ಥಾನವು ಯಾವ ದಿಕ್ಕಿನಲ್ಲಿ ಇರಬೇಕೆಂಬುದರ ಬಗ್ಗೆ ಮೊದಲೇ ಸವಿವರವಾಗಿ ವಿವರಿಸಿದ್ದೇನೆ. ವಾಸ್ತು ಪುಸ್ತಕವನ್ನು ಬರೆದ ವಾಸ್ತು ಪಂಡಿತರು ಹೇಳಿರುವಂತೆ ದೇವರನ್ನು ಈಶಾನ್ಯದಲ್ಲಿಯೇ ಇರಿಸಬೇಕೆಂದೇನು ಇಲ್ಲ. ದೇವರ ಮಂಟಪವು ಸ್ಟೇರ್ ಕೇಸ್ ಕೆಳಗಡೆ ಬರಬಾರದು ಹಾಗೂ ಶೌಚಾಲಯದ ಗೋಡೆಗೆ ಅಂಟಿಕೊಂಡಿರಬಾರದು ಮೇಲೆ ಅಥವಾ ಕೆಳಗೆ ಸಹಿತ ಬರಬಾರದು. ಇದಕ್ಕೆ ನಾವು ಕೊಡುವ ವೈಜ್ಞಾನಿಕ ಕಾರಣವೇನೆಂದರೆ ದೇವರ ಸ್ಥಾನವು ಒಂದು ಧನಾತ್ಮಕ ಶಕ್ತಿಯನ್ನು (Energy)  ಉತ್ಪನ್ನ ಮಾಡುತ್ತಿರುತ್ತದೆ. ಬಾತ್/ಡಬ್ಲ್ಯೂ.ಸಿ ನಲ್ಲಿ ಋಣಾತ್ಮಕ ಶಕ್ತಿಯು ಉತ್ಪನ್ನವಾಗುತ್ತಿರುತ್ತದೆ. ಆ ಕೋಣೆಗಳು ಅಕ್ಕ ಪಕ್ಕದಲ್ಲಿ ಬಂದಿದ್ದರೆ ಶಕ್ತಿಗಳ ವೈರುದ್ಯದಿಂದಾಗಿ ಅಲ್ಲಿ ವಾಸಿಸುವ ವ್ಯಕ್ತಿಗಳಿಗೆ ಮಾನಸಿಕ ಶಾಂತಿ, ಸಮಾಧಾನ ದೊರೆಯುವುದಿಲ್ಲ. ಆದುದರಿಂದ ದೇವರ ಮನೆಯನ್ನು ಕಟ್ಟಿಸುವಾಗ ಈ ಬಗ್ಗೆ ಗಮನ ಹರಿಸಿದಲ್ಲಿ ಈ ಎಲ್ಲ ತೊಂದರೆಯಿಂದ ಹೊರಬರಬಹುದು.