12. ಮನೆಯ ಯಜಮಾನನಿಗೆ ನೈರುತ್ಯ ಸ್ಥಾನ ಶ್ರೇಷ್ಠವೇ…

ಪ್ರಚಲಿತ ವಾಸ್ತುವಿನ ಪ್ರಕಾರ ಮನೆಯ ಯಜಮಾನನು ಮನೆಯ ನೈರುತ್ಯ ಸ್ಥಳದಲ್ಲಿ ಮಲಗಿದರೆ ಒಳ್ಳೆಯದು ಎಂದು ನಾವು ಒಪ್ಪಿಕೊಳ್ಳುತ್ತೇವೆ. ಆದರೆ ಸರಳ ವಾಸ್ತುವಿನ ಪ್ರಕಾರ ಹಾಗಿಲ್ಲದಿದ್ದಾಗ ಒಡೆದು ಮಾಡುವ ಅವಶ್ಯಕತೆ ಏನೂ ಇಲ್ಲ. ಮಲಗುವ ಕೋಣೆಯಲ್ಲಿ ಯಾವುದೇ ತರಹದ ಬೇಡದ ಸಾಮಗ್ರಿಗಳನ್ನು ಇಡಬಾರದು, ಹಾಗೂ ಮಲಗುವ ಕೋಣೆಯಲ್ಲಿ ಶೌಚಾಲಯವು ಇರದಿದ್ದರೆ ತುಂಬಾ ಒಳ್ಳೆಯದು. ಏಕೆಂದರೆ ನೀವು ಎರಡು–ಮೂರು ಸಲ ಶೌಚಾಲಯವನ್ನು ಉಪಯೋಗಿಸಿದಾಗ, ಅಲ್ಲಿ ತಯಾರಾದ ಋಣಾತ್ಮಕ ಶಕ್ತಿಯು ಮಲಗುವ ಕೋಣೆಯಲ್ಲೆಲ್ಲ ಹರಡುತ್ತದೆ. ಅದೇ ಶಕ್ತಿಯನ್ನು ನಾವು ರಾತ್ರಿ ಮಲಗಿದಾಗ ತೆಗೆದುಕೊಳ್ಳುವುದರಿಂದ ಅದು ನಮ್ಮ ಅನಾರೋಗ್ಯಕ್ಕೆ ಕಾರಣವಾಗುವುದು. ಹಾಗೂ ಮಲಗುವ ಕೋಣೆಯಲ್ಲಿಟ್ಟಿರುವ ಪ್ರತಿಯೊಂದು ಕನ್ನಡಿಯನ್ನು ರಾತ್ರಿ ಮಲಗುವಾಗ ಪರದೆಯಿಂದ ಮುಚ್ಚಬೇಕು.

ಒಂದು ಮುಖ್ಯವಾದ ವಿಷಯ ಗಮನದಲ್ಲಿರಸಬೇಕು. ಮಲಗುವ ಕೋಣೆಯಲ್ಲಿ ಉಗ್ರ ದೇವರ ಚಿತ್ರಗಳನ್ನು ಹಾಗೂ ಯುದ್ಧಕ್ಕೆ ಸಂಬಂಧಪಟ್ಟ ಸನ್ನಿವೇಷಗಳ ಚಿತ್ರಗಳನ್ನು ಹಾಕಬಾರದು, ಚಿತ್ರಗಳಲ್ಲಿ ನೀರಿರುವ ಕ್ಯಾಲೆಂಡರಗಳಾಗಲಿ, ಪೇಂಟಿಂಗ್‍ಗಳಾಗಲಿ, Fish Aquarium ಗಳನ್ನಾಗಲಿ ಇಡಬಾರದು. ಮಲಗುವ ಕೋಣೆಯಲ್ಲಿ ಶಾಂತ ವಾತಾವರಣ ಕಲ್ಪಿಸಲು ಅನುವು ಮಾಡಿಕೊಂಡ ನಿಸರ್ಗ ಚಿತ್ರಗಳನ್ನು ಹಾಗೂ ಜೋಡಿಯಲ್ಲಿರುವ ಪಕ್ಷಿಗಳ ಅಥವಾ ರಾಧಾ–ಕೃಷ್ಣ, ಶಿವ–ಪಾರ್ವತಿ ಇಂತಹ ಮೂರ್ತಿಗಳು ಅಥವಾ ಚಿತ್ರಗಳನ್ನು ಇಡಬಹುದು.

ನಿಮ್ಮ ಜನ್ಮ ದಿನಾಂಕದ ಮೇಲೆ ಅನುಗುಣವಾದ 4 ಒಳ್ಳೆಯ ದಿಕ್ಕಿನಲ್ಲಿ ಯಾವುದಾದರೂ ಒಂದು ದಿಕ್ಕಿಗೆ ತಲೆ ಮಾಡಿ ಮಲಗುವುದರಿಂದ ಆರೋಗ್ಯದಲ್ಲಿ ಸಾಕಷ್ಟು ಒಳ್ಳೆಯ ಫಲಿತಾಂಶವನ್ನು ನೀವು ಕಾಣುವಿರಿ. ನೈರುತ್ಯದಲ್ಲಿ ಮಲಗುವ ಕೋಣೆ ಇರದಿದ್ದರೂ ಭಯಪಡಬೇಕಿಲ್ಲ.